Версия для
слабовидящих

Больше . Сброс . Меньше

«Таптыыр эбээт сүрэ5им»музыкальнай хомуурунньук сүрэхтэниитэ

  Олунньу 17 күнүгэр ССРС суруйааччыларын союһун чилиэнэ, Саха АССР үтүөлээх учуутала, Эрилик Эристиин аатынан республиканскай бириэмийэ лауреата, Чурапчы улууһун Бочуоттаах олохтооҕо, Аҕа дойду Улуу сэриитин кыттыылааҕа, лирик-поэт, биһиги оскуолабыт үөрэнээччитэ, буойун-учуутала  А.С.Бродников төрөөбүтэ 100 сааһыгар тахсыбыт «Таптыыр эбээт сүрэ5им» музыкальнай хомуурунньугун сүрэхтэниитэ буолан ааста.
  Тэрээһин сыала: А.С.Бродников Чурапчыттан тахсыбыт биллиилээх суруйааччы, оскуолабыт үөрэнээччитэ, учууталбыт оло5ун, айар үлэтин билсиһии.
  Кинигэ сурэхтэниитигэр А.С.Бродников дириҥ уонна киэҥ ис хоһоонноох олоҕун, Аҕа дойду Улуу сэриитин уоттаах толоонугар сэриилэспит сылларын сырдатыыттан саҕаламмыта.
Алексей Спиридонович төрөөбүт дойдутун кэрэ айыл5атын, үтүө-мааны үлэһит дьонун, үрдүк үөрүүнү, тапталы, умсул5аннаах оло5у өйүнэн санаатынан ылынан, хара5ынан хай5аан, сүрэ5эр сөҥөрөн хоһуйбут хомо5ой, нарын тыллаах хоһоонноругар айыллыбыт саха биллиилээх композитордарын, талааннаах мелодистарын иэйиилээх, кэрэ дор5оонноох өйэлээх ырыалара “Таптыыр эбээт сүрэ5им” диэн музыкальнай хомуурунньукка түөрт түһүмэ5инэн тыырыллан киирбиттэр.
  Күннэй “Таатта” видеоклиба, Аграфена Кузьмина “Күөрэгэйдэр ыллыыллар”, Намыына “Эн быдан ордуккун” диэн запистара көрдөрүллэн, иһитиннэриллэн көрөөччүлэр сэргэхсийдилэр. Музыкальнай оскуола иитиллээччилэрэ Бродников хоһоонноругар айыллыбыт “Куһа5ан” диэн ырыаны, 10 кылаас үөрэнээччилэрэ Владимир Татаринов “Саҥа хаар” ырыатын, 2 кылаас үөрэнээччитэ Нарыйа Аржакова “Харыйа”, Лиза Родионова “Туллукчаан”, эдэр  учуутал Дьулустан Сергеевич Атаков “Гитара” диэн ырыаларын бэлэхтээтилэр. Алексей Бродников “Уус” диэн хоһоонун  6г кылаас уоланнара аахтылар.
  Россия суруйааччыларын уонна суруналыыстарын союһун чилиэнэ, СР культуратын үтүөлээх үлэһитэ, Хоптоҕо нэһилиэгин боччуоттаах гражданина, суруйааччы сиэн быраата  Павел Петрович Федоров-Сомоҕо, “Алиса” Россия оҕо вокальнай образцовай ансамбыла уонна  салайааччы  Любовь Юрьевна Макарова кэлэн кыттан тэрээһини киэргэттилэр.  Ыҥырыылаах ыалдьыттарга оскуола директора Н.В.Уарова махтал суруктары  туттарда.

   Тэрээһин таһымнаах буоларыгар сыраларын ууран үлэлэспит коллегаларбытыгар, о5олорбутугар махтанабыт, үлэ5итигэр, үөрэххитигэр үрдүк ситиһиилэри ба5арабыт.