Версия для
слабовидящих

Больше . Сброс . Меньше

В.С.Яковлев-Далан музей-дьиэтигэр мемориальнай дуоска аһыллыыта

        В. С. Яковлев- Далан 90 сааһын көрсө төрөөбүт күнүгэр, муус устар бастакытыгар, кини дьиэ кэргэнинээн олорбут, “Дьикти сааһын” суруйбут дьиэтигэр мемориальнай дуоска аһыллыыта буолла.
       Кини тапталлаах чугас дьоно: эрэллээх доҕоро, кэргэнэ Яна Викторовна, Австралияттан улахан оҕото  Ольга Васильевна Анисимова, Москваттан уола Семен Васильевич, кэргэниниин уолунуун, Дьокуускайтан кыра кыыһа Лолита Васильевна кыыһын уонна уолун кытта – аҕаларын, эһэлэрин кэриэстии,  төрөөбүтэ 90 сылын    бэлиэтии бука бары тоҕуоруһан кэлбиттэр. Ону тэҥэ чугас аймахтара: Далан бииргэ төрөөбүт балта  Елена Семеновна Слепцова Тааттаттан, быраата Василий Семенович Яковлев  Дьокуускайтан чугас дьоннорунуун, Чурапчыттан улахан балтын Клара Семеновна о5олоро Барашковтар кыттыыны ыллылар.
      Кэлбит дьоһун-мааны ыалдьыттары Далан үбүлүөйдээх күнүнэн улууспут аҕа баһылыга Андрей Тимофеевич Ноговицын, олохтоох С.А.Новгородов аатынан оскуола директора Надежда Васильевна Уарова эҕэрдэлээтилэр
      Саха биллиилээх суруйааччылара: Саха сирин Суруйааччыларын сойууһун бэрэссэдээтэлэ, норуодунай поэт Наталья Ивановна Харлампьева, норуодунай суруйааччы Семен Андреевич Попов- Сэмэн Тумат, поэт, критик Николай Егорович Винокуров-Урсун, Далан айымньыларын, ол иһигэр аатырбыт “Тыгын Дарханы” нуучча тылынан саҥардыбыт тылбаасчыт, критик Аита Ефимовна Шапошникова, Далан суруйааччы үөрэнээччитэ Павел Петрович Фёдоров- Сомо5о  бу үөрүүлээх түгэҥҥэ кыттыннылар.
       Далан “Дьикти саас” айымньытын геройдара буолбут күндү үөрэнээччилэрин, оскуолабыт 1969 уонна 1971 сыллаах выпускниктарын, үөрэ-долгуйа көрүстүбүт. Учууталларын кэриэстиир, ытыктыыр ытык иэс быһыытынан Мемориальнай дуосканы оҥотторон аҕалбыт 1971 сыллаах выпускниктартан үөрэнээччитэ, ыкса ыала Вера Михайловна Филиппова учууталын, кини дьиэ кэргэнин туһунан истиҥ ахтыыны оҥордо.  Василий Семёнович Яковлев - Далан үөрэнээччилэрэ бүтүн олохторунан, киһилии сиэрдээх быһыыларынан- майгыларынан, үлэлэринэн-хамнастарынан чахчы да кини дьоллоох учуутал буоларын кэрэһэлииллэр.
      Үлэлээбит оскуолатын билиҥҥи үөрэнээччилэрэ саха саарына, норуодунай суруйааччы В.С.Яковлев-Далан үтүө холобуругар иитиллэллэр. Улуу биир дойдулаахпыт төрөөбүт күнүгэр кырдьык иһин турууласпыт олоҕун, айар үлэтин арыйар «Кынаттаах ыралаах дьикти саас» дьүһүйүүнү  оскуолабыт уоланнара толорон, мустубут дьону долгуттулар. Ону тэҥэ Далан музей-дьиэтин ис хоһоонун 7 б кылаас оҕолоро кэлбит ыалдьыттарга киэҥник сырдаттылар. Биир экскурсовод үөрэнээччим олус долгуйан туран: «Далан үс оҕотун үһүөннэрин көрдүм дии,»-диэн үөрбүтэ олоҕун тухары сырдык өйдөбүл буолан хаалыаҕа