Версия для
слабовидящих

Больше . Сброс . Меньше

"Ийэ алгыһа" кинигэ сүрэхтэннэ

       Ааспыт нэдиэлэ5э ытыктыыр-убаастыыр ветеран-учууталбыт, оскуолабыт выпускницата, 5 оҕо күн күбэй ийэтэ, элбэх сиэн эйэҕэс эбэтэ, Үлэ, тыыл ветерана, “Методист-учуутал”, “Гражданскай килбиэн” бэлиэ хаһаайката, “Учууталлар учууталлара”, Чурапчы сэлиэнньэтин бочуоттаах олохтооҕо Мария Алексеевна Сидорова- Тытыгынаева олоҕун сырдатар “Ийэ алгыһа” кинигэтин сүрэхтэниитэ буолан ааста. Кыттыыны ыллылар кыргыттара Антонина Борисовна Винокурова-СӨ үтүөлээх экэнэмииһэ, Россия сыананы сүрүннүүр органнарын бочуоттаах үлэһитэ, СӨ олох-дьаһах коммунальнай хаһаайыстыбатын бочуоттаах үлэһитэ, Правительство чилиэнэ, Сыана политикатын Госкомитетын бэрэссэдээтэлэ, биһиги оскуолабыт выпускницата; кини уола Винокуров Иван Николаевич- Туймаада- нефть тутууга инженера; Александра Борисовна Алексеева-Кулуһун - Мария Алексеевна кыра кыыһа, СӨ култууратын туйгуна, саха мелодистарын сойууһун чилиэнэ, Дьокуускай куорат национальнай гимназиятын эбии үөрэхтээһин салаатын учуутала. Ону таһынан кинигэ сүрэхтэниитигэр кыттыыны ыллылар Мария Алексеевнаны кытары араас кэмҥэ бииргэ үлэлээбит коллегалара-убаастыыр ветеран учууталларбыт, уонна кини выпустаан таһаартарбыт үөрэнээччилэрэ.
    Кинигэни Мария Алексеевна оҕолоро, күтүөттэрэ, кийииттэрэ, сиэннэрэ таһааттардылар. Редактор Антонина Борисовна Винокурова. Кинигэ тираһа 100 экз.
    Кинигэҕэ Мария Алексеевна олоҕун кэпсээнэ, үөрэммит, үлэлээбит оскуолата, хас биирдии оҕотугар, сиэнигэр, аймахтарыгар, Егор Афанасьевич Борисовка, дьүөгэлэригэр, коллегаларыгар анабыл ахтыылара, хоһоонноро, алгыстара  киирбиттэрэ киһини үөрдэр. “Ойуу-бичик олоҕор” тугу кэрэхсээбитин, суолталаах түгэннэрин, оһуордуур ойуутун курдук, хоһоонугар тиспит, алгыһын анаабыт.
    Мария Алексеевна сырдык санаалаах, сылаас тыыннаах алгысчыт буолан кинигэтин презентацията сүрдээх истиҥник ааста. Биһиги оскуолабытыгар бэйэтин суолун-ииһин хаалларбыт методист учуутал Сидорова-Тытыгынаева Мария Алексеевна оҕолоругар, ыччаттарыгар маннык ийэлэрин аатын үйэтитэр кэрэхсэбиллээх киэһээни бэлэхтээбиттэригэр истиҥник  махтанабыт.