Версия для
слабовидящих

Больше . Сброс . Меньше

"Тыыннаах тыл" илин эҥэрдээҕи эдэр ааҕааччылар күрэхтэрэ

   Олунньу 15 күнүгэр Таатта Тыараһатыгар Россияҕа театр, Саха сиригэр Сомоҕолоһуу, ону сэргэ төрөөбүт тыл, сурук-бичик күнүгэр аналлаах "Тыыннаах тыл" илин эҥэрдээҕи эдэр ааҕааччылар күрэхтэрэ буолан ааста. Тэрийээччилэринэн М.Н.Турнин аатынан Тыараһа орто оскуолата (сал. Полускин П.В ), Л.Н.Турнин аатынан "Алгыс" норуот айымньытын дьиэтэ (сал. Сабарайкина А А.)  буоллулар. Бырайыак ааптара - "Алгыс" норуот айымньытын дьиэтин уус-уран салайааччыта, Россия Суруналыыстарын союһун чилиэнэ Галина Полускина.
   Күрэххэ Таатта, Чурапчы, Амма улуустарыттан уопсайа тоҕус оскуолаттан (Тыараһаттан 2 оскуола, Чөркөөх, Ытык-Күөл, Чымынаайы, Амма улууһуттан Алтан, Соморсун орто оскуолалара, Чурапчы улууһуттан Чурапчы орто оскуолата, улуустааҕы гимназия, Соловьев орто оскуолата) барыта  63 оҕо кыттыыны ылла.
   Кыра бөлөххө (1-5 кылаастар) 41, улахан бөлөххө (6-11 кылаастар) 22 оҕо  кыттан, Саха сирин народнай суруйааччыларын айымньыларыттан ааҕан иһитиннэрдилэр. Күрэх уратыта - кыттааччылар проза жанрыгар (кэпсээн, сэһэн, роман) хапсар айымньылары, эбэтэр онтон быһа тардыылары эрэ аахтылар. Тэрийээччилэр сүбэлэһиилэринэн онно эбии ааптардаах остуоруйалар уонна драматтан монологтар киирэллэрэ көҥүллэммитэ.
   Кыттааччылар сүрүннээн улуу классик суруйааччылар А.И.Софронов, Н.Д.Неустроев, П.А.Ойуунускай, биллэр прозаиктар Н.Е.Мординов -Амма Аччыгыйа, Д.К.Сивцев - Суорун Омоллоон, Софрон Данилов, Николай Золотарев - Якутскай, о.д.а айымньыларыттан ааҕан иһитиннэрдилэр.
   Дьүүллүүр сүбэҕэ Россия, Саха сирин суруйааччыларын союһун чилиэнэ, "Чолбон" литературнай сурунаал үлэһитэ ИВАН ОСИПОВ - ОЙУУР УЙБААН, П.А.Ойуунускай аатынан Саха академическай театрын артыыһа, директоры солбуйааччы ПЕТР МАКАРОВ, республикатааҕы Кэскил" оҕо хаһыатын корреспондена ПАВЕЛ ИЛЬИН, Саха сирин суруйааччыларын союһун чилиэнэ, суруйааччы Ирина КОЛОДЕЗНИКОВА, Тааттатааҕы "Кустук" оҕо образцовай драматическай театрын салайааччыта ТАТЬЯНА ЗАХАРОВА, Таатта улууһун үөрэҕин управлениетыттан  НАРИЯНА ОХОТИНА үлэлээтилэр.
   Күрэх сүүмэрдиир түһүмэҕэ бөлөхтөрүнэн арахсан икки сиринэн тэҥинэн ыытылынна. Онтон түмүктүүр түһүмэххэ икки бөлөхтөн уопсайа 16 ааҕааччы талыллан киирдэ.
  П.А.Ойуунускай "Кыһыл ойуун" драматтан монолог толорон оскуолабыт 10 кылааһын үөрэнээччитэ,  "Үөрүү" оҕо сайдар киинин "Үрдэл" театральнай куруһуогун иитиллээччитэ Скрябин Ярослав Гран - При хаһаайынынан буолла, салайааччы Алина Ивановна Собакина. Ярославы уонна  Алина Ивановнаны ситиһиилэринэн эҕэрдэлиибит, инникитин да айымньылаах үлэҕит биллэ турдун!