Версия для
слабовидящих

Больше . Сброс . Меньше

Киһи кыаҕа, күүһэ муҥура суох.

  Муус устар 18 күнүгэр Россияҕа “Театр” сылын, республикаҕа улууска “Консолидация” сылын чэрчитинэн, биһиги улуускааан бастаан«Салют-Талантам» доруобуйаларынан хааччахтаах дьоммут талааннарыгар анаммыт улуустааҕы  фестиваль үрдүк таһымҥа ыытылынна. Барыта 10-ча нэһилиэктэн 100 кыттааччы дьоҕурдарын, сатабылларын үрдүк сыанаттан көрдөрөн, киһи кыаҕа, күүһэ муҥура суоҕун толору көрдөрдүлэр. “ Айылгы” культурнай киин киэҥ уораҕайыгар сарсыарда 10ч оҕолорго отборочнай тур ыытылынна, киэһэ 18ч “Творчество без границ”- гала-кэнсиэр буолла. Бу тэрээһини иилээн-саҕалаан ыыппыт Чурапчы улууһугар баар доруобуйаларынан хааччахтаах дьону түмэр общественнай түмсүү (сал.Р.Г.Дьячковская), соторутааҕыта тэриллибит “Самоцветы” түмсүү (сал.Е.С.Филиппова) уонна улуус салалтатын социальнай управленията (сал.М.П.Заболоцкая) сүрүннээн ыыппыттара олус хайҕаллаах. Кэлбит кыттааччылары улуус дьаһалтатын баһылыгын социальнай боппуруостарга солбуйааччы Н.И.Аммосов, социальнай управления тэрилтэ (сал.Л.В.Тосукаева), “Матери России” түмсүү, улуустааҕы ыччат Координационнай Сүбэтэ истиҥ эҕэрдэлэрин, баҕа санааларын тиэртилэр.
   Биһиги оскуола үөрэнээччилэрэ: Павлова Алена фольклор жанрыгар хомуска оонньоон дьүрүһүтэн, I степеннээх лауреат, Кычкина Күннэй эмиэ фольклор жанрыгар үгэ ааҕан, II степеннээх лауреат, Дьячковский Леня аныгы хип-хоп үҥкүүнү толорон II степеннээх лауреат ааттарын ылан үөрдүлэр-көттүлэр, көрөөччүлэри сэргэхситтилэр. Маны таһынан, оҕолорбут “Таал-таал эмээхсин”- саха норуотун остуоруйатынан туруоруллубут театральнай постановкаҕа ситиһиилээхтик кыттан, Гран-При үрдүк аатын ылары ситистилэр. Постановканы учуутал төрөппүт “Самоцветы” түмсүү чилиэнэ Кычкина В.В.сатабыллаахтык туруорда, оҕолору бэлэмнээтэ. Таал-таал эмээхсини – Кычкина Күннэй, былыты – Павлов Женя, тыалы – Кривошапкина Юля, хайаны – Макаров Петя, киһини – Дьячковский Леня, автор оруолун – Никитина Нарыйаана кэпсээн, ыллаан толордо уонна “Самоцветы” театральнай куруһуок кырачаан чилиэттэрэ кытыннылар, бары да итэҕэтиилээхтик оонньоон, көрөөччүлэргэ биһирэттилэр. Музыкальнай оскуола “Вокал” кылааһыгар дьарыктанар кыргыттарбыт  Павлова Алена, Афанасьева Карина, Кычкина Күннэй, Никитина Нарыйаана ансамбльга ыллаан, залга олорооччулар хайҕабылларын ыллылар.
  Этэр курдук, орто дойду олоҕор хас биирдии киһи араас кыһалҕалаах. Онтон бу курдук доруобуйаларынан хааччахтаах дьоммут тус мэһэйдэри туорууллара, бэйэлэрин таһаараллара улахан үлэттэн, түмүктэн кэлэр. Маныаха, кинилэр кыһалҕаларын чугастык ылынан, уопсай үлэни тэрийии бу барыбыт ситиһиитэ, сайдыыта буолар. Бу күн быыстапка арааһа, атыы-тутуу тэрилиннэ. Оскуолабыт администрацията оҕолору таһарга бу күн автобус биэрэн, барары-кэлэри чэпчэттэ, онон оҕолор төрөппүттэр ааттарыттан махталбытын тиэрдэбит.