Версия для
слабовидящих

Больше . Сброс . Меньше

Открытие центра "Точка роста"

    Балаҕан ыйын 24 күнүгэр Россия үрдүнэн федеральнай “Современная школа”, республиканскай “Образование” национальнай бырайыактар чэрчилэринэн биир бириэмэҕэ 2049, ол иһигэр Сахабыт сиригэр 54 тыа сирин оскуолатыгар цифровой уонна гуманитарнай профиллары сайыннарар «Точка роста» кииннэр үөрүүлээхтик аһылыннылар.
   Чурапчы улууһугар икки оскуола үөрүүлээх түгэни бэлиэтээтэ. С.А.Новгородов аатынан Чурапчы орто оскуолатыгар киин тэрээһинигэр элбэх үлэ ыытылынна. Күүтүүлээх-кэтэһиилээх күнү бука бары долгуйа күүттүбүт. Киини арыйыыга үөрэнээччилэр, үлэһиттэр, төрөппүттэр, ыҥырыылаах ыалдьыттар тоҕуоруһа муһуннулар. Бастакынан эҕэрдэ тылы “Чурапчы улууһа” МТ дьаһалтатын дьыала отделын начальнига Л.А.Макарова эттэ. Салҕыы Чурапчы улууһун үөрэҕин салаатын начальнига Ю.П.Посельский, Чурапчы нэһилиэгин ыччаты кытары үлэҕэ специалиһа В.В.Илларионов, оскуола дириэктэрэ Н.В.Уарова, 11 кылаас үөрэнээччитэ Ярослав Скрябин эҕэрдэлэрин эттилэр, баҕа санааларын тиэртилэр.
    Оскуола дириэктэрэ Н.В.Уарова улууска бастакынан маннык киин биһиги оскуолабыт базатыгар тэриллэрин талбытыгар СР Үөрэҕин министерствотыгар махтанарын эттэ. Киин аныгы үйэ дьонун иитэн-үөрэтэн, сайыннаран таһаарыыга көмөлөөх буолуоҕун уонна СР Ил Дархана А.С.Николаев үөрэхтээһини сайыннарыыга туруорар соруктарын ситиһиигэ төһүү күүс буолуо диэн эрэлин тириэртэ. Итиэннэ киин салайааччытынан А.Н.Собакина анаммытын билиһиннэрдэ. Ярослав Скрябин үөрэнээччилэр ааттарыттан барҕа махталын тириэртэ, киин биһиги сайдарбытыгар тирэх буолуо диэн эттэ.
    Киин арыллыытын аалай кыһыл  лиэнтэтин Л.А.Макарова, Н.В.Уарова, Ярослав Скрябин ытыс дохсун тыаһынан быстылар.
  “Точка роста” киин үөрэнээччи билиитин хаҥатан, дьоҕурун үксэтэн, сатабылын сайыннаран айымньылаахтык, ситиһиилээхтик үлэлээтин диэн баҕа санаабыт бастыҥын аныыбыт.