Версия для
слабовидящих

Больше . Сброс . Меньше

«Уол оҕо аҕыс кырыылааҕа» спортивнай - интеллектуальнай күрэх

«Уол оҕо аҕыс кырыылааҕа» спортивнай - интеллектуальнай күрэх

Быйыл, олунньу 25 күнүгэр  С.А.Новгородов аатынан Чурапчы орто оскуолатыгар  үгэс буолбут    «Уол оҕо аҕыс кырыылааҕа» спортивнай- интеллектуальнай күрэх  7-с төгүлүн ыытылынна. Бу ини – бии уолаттар күрэхтэһиилэрэ Улуус бочуоттаах олохтооҕо, Аҕа дойду Улуу сэриитин кыттыылааҕа, «Кыһыл  сулус», «Норуоттар доҕордоһуулара»  орденнар кавалердара, РСФСР үөрэҕириитин туйгуна буойун – учуутал  Г.Д.Ефимов үтүө аатын үйэтитэр сыаллаах  ыытыллар.  Быйыл,  үрдүкү  кылаас уолаттара  6 хамаанда: Чурапчы улуустааҕы гимназиятыттан Владислав уонна Вячеслав Матвеевтар,  республикатааҕы спортивнай –интернат оскуолаттан Михаил уонна Александр Макаровтар , Төлөйтөн  Родимир уонна Рихард Поповтар, Хатылыттан  Святослав Лебедев  уонна  Михаил Борисов,  Дириҥтэн  Евсей уонна Иван Дьячковскайдар,  С.А. Новгородов аатынан оскуолаттан Эрхан уонна Ким Лукиннар кытыннылар. Күрэхтэһии кыттыылаахтарын  оскуола  директора Н.В.Уарова эҕэрдэлээтэ. Оскуолабыт 3 кылааһын  уолаттара «Олимпа суолунан»  литературнай композицияны ,  11 кылаас үөрэнээччитэ Павел Алексеев  Г.Д. Ефимов фроҥҥа  айбыт «Көрсүһүү » хоһоонугар ырыаны толордулар. Кыттааччылар бэйэлэрин билиһиннэрдилэр, бары кэриэтэ элбэх оҕолоох ыал оҕолоро эбиттэр. Кинилэр 8 түһүмэҕи аастылар, эрдэ кыра группаҕа күрэхтэспит  буолан  сатыыллара  көстөр. Бастакынан, Г.Д.Ефимов « Мин дойдуну, дьону, оло5у таптыыбын» этиитигэр олоҕуран,  дьиэтээ5и  сорудах быһыытынан, олохтоох бэйэни салайыныы проблематыгар бырайыак көмүскээтилэр . Компьютернай салоҥҥа, интеллектуальнай  күрэххэ сорудахтары толордулар. Мелодияны таайыыга, уол оҕо сатабылыгар-уһаныыга, дойдуну көмүскүүргэ бэлэми көрдөрөр- автоматы  өһүлүүгэ- хомуйууга, остуол оонньуутугар - хабылыкка, булчут сатабылыгар –сыал ытыыга  эгил- тэгил күрэхтэстилэр. Түмүккэ, республикатааҕы спортивнай –интернат оскуолаттан Михаил уонна Александр Макаровтар бастакы миэстэни ыллылар. Төлөй оскуолата- иккис, Дириҥ – үһүс буоллулар.

 

Ил Түмэн бастакы председателэ Афанасий  Петрович  Илларионов    Г.Д. Ефимовы 75 сааһынан  эҕэрдэлииригэр « эргиччи талааннаах  киһи, уол оҕо аҕыс кырыылааҕа» диэн олоҕун, үлэтин аҕыс өттүттэн сырдатан, үрдүктүк сыаналаабыта. Буойун - учуутал кэриэһигэр сыл аайы  ыытыллар бу күрэхтэһии оҕолор дьоҕурдарын араас өттүттэн  арыйарга көмөлөһөр. Маннык тэрээһин  эдэр көлүөнэни төрөөбүт дойдуну таптыырга үөрэтэр, аҕа көлүөнэ төрүт- уус дьонунан киэн туттар  кыаҕын  үөскэтэр. Быйыл карантин мэһэйдээн,ыаллыы улуустар кыайан кыттыбатылар, кэлэр сылга  региональнай күрэхтэһии буоларыгар эрэнэбит.

Матвеева Т.К. – норуот үөрэҕириитин туйгуна,  оскуола музейын педагога, С.А.Новгородов аатынан Чурапчы бүттүүн үөрэхтээһин орто оскуолата