Версия для
слабовидящих

Больше . Сброс . Меньше

Алтан чуораан үөрэнээччилэрин ыҥырда

Муус устар 9 күнэ. С.А.Новгородов аатынан Чурапчы орто оскуолата – “Дархан кыһата”. Сааскы сайаҕас сарсыарда улуус биир кырдьаҕас оскуолата, биэс уон сыллааҕыны санатан, алтан чуораан лыҥкынас тыаһынан олох суолугар атаарбыт үбүлүөйдээх уон икки выпустарын үгэс буолбут “Көлүөнэлэр көрсүһүүлэригэр” ыҥырда. Ыраахтан-чугастан оҕо саастарын чаҕылхай күннэрин, эдэр саастарын эрчимнээх кэмнэрин, үөрэппит учууталларын ахта-саныы, мэниктээбит, сүүрбүт-көппүт переменаларын, билиигэ тардыспыт, үгүс умнуллубат сырдык күннээх оскуолатааҕы сылларын ахтыһа уолаттар, кыргыттар долгуйа тоҕуорустулар.

 

    Оскуола иитэн-үөрэтэн таһаарбыт хас эмэ көлүөнэ ыччаттарын бырааһынньыктыы симэнэн көрүстэ. Бастакы этээскэ”Умнуллубат оҕо саас” чинчийэр үлэ түмүктэринэн матырыйааллар, оччотооҕу оскуола оҕолорун күннээҕи туттубут малларын выставката ыалдьыттарга үгүһү санатта. Иккис этээскэ “Оскуола киэн туттар выпускниктара” стендэлэр интэриэһи тартылар. Үһүс эттээскэ “Сэбиэскэй оскуола” экспозиция хас биирдии ыалдьыты долгутта. Манна алта паарта, учуутал остуола, атахтаах дуоска, пионерскай уголок, кылаас уголога, икки этээстээх оскуола макета уруккуну саната туруоруллубуттар. Кылааска киирдэххэ кыһыл хаалтыстаах пионер оҕолор үөрэнэ олороллор, эдэр учуутал кыыс ахсаан уруогун ыытар. Бу оскуола алтыс “в” кылааһын үөрэнээччилэрэ, кылаас салайааччыта Собакина О.К. оччотооҕу кэмҥэ киирэн таҕыстылар. Барыта дьиҥнээх, барыта оччотооҕу кэми санатар кэрэ түгэн. 

    “Оҕо саас сырдык өйдөбүнньүгэ” галерея аһыллыытын сиэрэ-туома ыытылынна. Иккис этээһи тилэри, икки эрээтинэн туруоруллубут галереяҕа 1953 сылтан саҕалаан, Чурапчы орто оскуолатын бүтэрбит үөрэнээччилэр, кылаас салайааччыларын, оскуола салалтатын  

мөрсүөннэрэ  аныгы үйэлээх матырыйаалынан оҥоһуллубут, уотунан сырдатыллыбыт  стендэлэргэ үйэтитиллибиттэр. Барыта 62 выпуск, 3800-тэн тахса выпускник.

   “Ис сүрэхтэн” эҕэрдэ кэнсиэр үрдүк таһымнаахтык ааста. Оҕолор хомоҕой хоһоонноро, ылбаҕай ырыалара, тэтимнээх үҥкүүлэрэ, педколлектив хора ыалдьыттар сүргэлэрин көтөхтө.                   

   “Эргилинним оскуолабар” 7-11 кылаастарга ыалдьыттар кыттыылаах кылаас чаастара оҕолорго да, ыалдьыттарга үтүө өйдөбүлү хаалларда.

    Музей, эбии үөрэхтээһин, киинэ сылларыгар аналлаах Брейн-ринг олус көхтөөхтүк, сэргэхтик ыытылынна. 

    Биир умнуллубат түгэнинэн “Дьикти саас ыллыгынан” оскуола учуутала, завуһа, народнай суруйааччы В.С.Яковлев-Далан олорбут дьиэтигэр музей аһыллыыта буолла. Манна суруйааччы туттубут мала-сала, туттубут тэриллэрэ, Далан дьиэ кэргэнэ уларсыбыт сэттэ экспоната, “Дьикти саас” бастакы, иккис чааһын копиялара, айар үлэтин выставката туруорулуннулар. Музей-дьиэҕэ  киирдэххэ оттуллубут оһох сылааһа, алаадьы минньигэс сыта, сэттэ уонус сыллардааҕы ыал иһитэ-хомуоһа, ыскааба, ыскамыайката, остуола, истиэнэ араадьыйата, хоско орон, араамалаах хаартыскалар, дьаарыстаммыт чымадааннар, саала хоско таҥас сабыылаах урукку телевизор, хомуот, серваҥҥа сувенирдар кэм кэрэһитэ буолан тураллар. Суруйааччы үлэлиир остуолугар машинката, “Дьикти саас” сэһэнин копията, харытын чаһыта, остуолун лаампата, ачыкыта, чорооннор туруоруллубуттара дьикти тыыны биэрэр. Бары урукку кэм долгунугар киирэн олуһун долгуйдубут.

     Эбиэт кэннэ уолаттар, кыргыттар  “Оҕо сааһы эргитэн” көрдөөх стартар  оонньууга кыттан мэниктээн, сүүрэн-көтөн, күрэхтэһэн ыллылар. “Билигин да буорахпыт баар эбит” диэн астынан ыллылар.    

   “Көлүөнэлэр көрсүһүүлэрэ”  олус истиҥник ис сүрэхтэн ыытылынна. Саамай а5а саастаах көлүөнэ, 1956 сыллаах выпустан, Кобельянова Е.Д. эҕэрдэтин тиэртэ. Ол кэнниттэн биэс уон сыллааҕыта оскуоланы бүтэрбит түөрт уон оҕо, бүгүн  түс-бас дьоһун дьон сценаҕа ытыс тыаһын доҕуһуолунан таҕыстылар. Утуу-субуу үбүлүөйдээх выпустар эҕэрдэлэрин, алгыстарын, учууталларга дириҥ махталларын эттилэр. Бу үөрүүлээх  күҥҥэ 88 выпускник уонна Саха республикатын кылаабынай пионер баһаатайа Оконешникова Л.В. кытыннылар.                 

    Тэрээһин “Эргичий, ыллаа-туой,  үҥкүүлээ оҕо саас!” сынньалаҥ көхтөөх киэһэтинэн түмүктэннэ.                                                                   

                           

 

                                                                                   “Тускул” пресс-киин